Le dieci piaghe ...

...fonti MOOLTO apocrife dal deserto di Giudea...
(Ritrovamento del 09/11/2010)

I dies alvadei d’Egit

Tanti ani prima ch’a nasés Gesù Bambin al popolo d’Israele al sgobava in negar par al Faraun.

Le dòne le catava su al furmentùn, i’om i faseva i masalìn e i putin i menava in gir le pegure.

L’unic ch’a lavurava mia l’era Mosè, ch’al pasava le giurnade davanti a la playstescion.

An giuran, intant ch’ l’era ‘dre far an pasacor a l’umbrìa, al sent la vus da Dio ch’agh dis:

“Mosè cata su la me gent e menla fora adl’Egit, parchè lì a gh’è trop cald!”

“E indu la porti, a Boario ?!" – agh admanda Mosè

“No! A Boario gh’è tropi vech! Porta tuti in Palestina, che li gh’è an bel freschin e gh’è nisun c’av da fastidi!”

“S’a tal disi ti …!” - al dis Mosè rasegnà, che ormai a forsa da far adla strada a pe al gh’eva di pulpas adme Gino Bartali.

In qatr-e-quatr-ot al mucia tute le dùdas tribù, as met davanti cun l’umbrelin in aria e’l part con tuta la su gent dadrè cume al trenino da BuonaDomenica.

In dal gir da na smana al furmentun al taca a smarsir, le pegure le stramina baline ad merda in tuti i cantun e le vache le sçiopa.

Quand al Faraun al s’n’intàia al manda a ciamàr la Celere par cùrar adrè ai israelian.

Nonostante i gh’abia na smana ad vantagio, i’gh’imbriga mia tant a ‘rivari; anca parchè Mosè l’è mia na schegia, e ogni tant a gh’è da far na sosta par far la foto, catar su i luartìs e far pisar al nono.

Fato-sta-ed-è che in an pèr ad giuran l’esercit dal Faraun l’è bèla rivà a sgagnagh i calcagn ai’israelian!

“Dio! – l’implora Mosè - Par piasér, das na man ti, parchè dopo na smana ch’a caminema am girarìa le bale a duver turnar indrè!”

“Sta mia malarat Mosè, vualtar seguitè a caminar, che mi agh tiri dies cancar ai Egisian ch’i restarà ciarì!”

Difati, in dal gir d’an quart d’ora, insìma l’Egit a casca le dies maledisiun promese dal Signur:

Sansale,

Fiapole,

Camole,

Sìmas,

Pioçh,

Pulack,

Foch ad Santantoni,

Scavsèra,

Emoroidi,

e Sangue dal nas.

Intant che i suldà dal Faraun is ferma par daras al Polaramin e par prenutar na visita specialistica dal proctologo, i israelian pian-pianin i s’invia vers al confine con la Palestina e quand i riva al duty-free i’s ferma infin’ a cumprar le cartuline.

D’alura-e-quela, par ricurdar la bugada ch’i eva sugà durante la fuga d’Egit, i ebrei i festegia la Pasqua magnando l’agnèl e nualtar a festegiema magnando la culumba, cl’è cume al panetun, ma men tgnisa, visto cl’è l’impast ch’a vansà dai panetun ad Nadal.

L'è parola dal signur