La parabula dal seminadur

...fonti MOOLTO apocrife dal deserto di Giudea...
(ritrovamento del 27/02/2008)

La Parabula dal seminadur 

Visto ch’a gh’era na bèla giurnàda, Gesù l’era andà cui disèpui a ciapàr an po’ ad sul in sal lac ad Galilea, cl’era an mare, ma al spusàva ad freschìn.
In spiàgia a gh’era na mùcia ad gent e gnanca an mètar indua stendar al sugamàn, alura ‘l Signur al rampa in s’al pontile, as volta vers ‘i umbrelùn e ‘l cunta la fòla dal seminadur.
An cuntadìn al va a somnàr in di camp, ma sicùme a l’è ‘n sandròn, al bùta la smensa a la còia.
Soquante smense le casca inmès’a la carszàda. A riva le puiàne e le magna su tut.
Soquante smense le casca inmès’a la gèra, ma le mor sùbit parchè nisùn a i’a d’acqua.
Soquante smense le brìgula in lunga a la scarpàda, ma le’s szela tute suta a la galavèrna.
Set u òt granìn, par fortuna i casca in ‘dla tèra giusta e fiurìs tante bèle piantine ad furmentùn.
“Pietro èt capì la morale adla fàvula?!” – al dis Gesù
“Mi no veh!” – al cunfèsa Pietro – “Gh’è al sul ch’a pìcia e mi sun sensa capèl…!”
“Giuda èt ascultà la parabula?!”
“Mi no veh!” – al dis Giuda – “Seri ‘dre vardàr le tedesche in topless!”
“Tomaso èt sentì la parabula!?”
“Si veh! Ma mì a credi ch’a sia cresì le piantine sultant quand’a vedi al furmentùn!”
“Certo ch’am ia sun sercà propria cul lanternìn! Al trist, al pégar e’l malsicùr!” – al cumenta al Signur bonariamente.
“La parola dal Signur l’è la smensa.
La testa da Pietro l’è la carszàda, a pìcia al sol, i granìn is cos e adio smensa!
La testa da Giuda l’è la gerà, par vardàr le tedesche in topless as dismenga d’inafiàr e adio piantine!
La testa da Tomaso l’è la scarpàda, al quacia tuti i but cul giàs dal dùbi e adio furmentun!”
Morale ‘dla favola: sperema da catàr cristian pusè disgnalà! Se no, adio polenta!

L'è parola dal signur